شرعی اصطلاحات کے ترجمے / غلط فہم سے پیدا ہونے والی غلطیاں، آپ بھی مثال پیش کریں

سنن ترمذی میں ابوھریرۃ رضی اللہ عنہ کہ روایت ہے کہ رسول اللہ ﷺ نے فرمایا إِذَا قُبِرَ الْمَيِّتُ، أَوْ قَالَ: أَحَدُكُمْ، أَتَاهُ مَلَكَانِ أَسْوَدَانِ أَزْرَقَانِ، يُقَالُ لأَحَدِهِمَا: الْمُنْكَرُ، وَلِلآخَرِ: النَّكِيرُ."
یہاں اسودان ازرقان کے ترجمے کے بارے میں ایک ابہام ہے۔ ظاہرا اس کا ترجمہ کالے نیلے ہو گا۔ لیکن صاحب تحفۃ الاحوذی نے لکھا ہے کہ ازرقان سے مراد ان کی آنکھوں کا رنگ ہے۔

 

اس میں اچنبھے کی تو کوئی بات نہیں ہے؛ کیونکہ ترجمہ اور شرح میں یہی تو فرق ہے، آپ نے لفظی ترجمہ کیا ہے اور صاحب کتاب نے اس کی مزید وضاحت کی ہے۔
واللہ اعلم

 

ایسے مواقع پر لفظی ترجمہ بہتر ہے یا تفسیری؟

 

یہ تو ظاہر ہے کہ تحفۃ الاحوذی شرح ہے اس میں ترجمہ ممکن نہیں، تو ایسے میں شرح ہی ہو سکتی ہے ترجمہ تو ممکن نہیں ہے، ویسے اس حدیث کے دیگر الفاظ دیکھنے سے بھی تسلی ہو سکتی ہے کہ یہاں ازرقان سے مراد کیا ہے؟

مزید یہ کہ ترجمہ بھی ایک حد تک تفسیر ہی ہوتی ہے۔

 

صبغۃ اللہ کا ترجمہ اللہ کا رنگ ( سورۃ البقرۃ 138) جب کہ یہاں اللہ کا دین مراد ہے۔
اردو تراجم کی اکثریت میں یہی ترجمہ کیا گیا ہے اس لیے اہل اردو کو سمجھانا مشکل ہو جاتا ہے۔یہاں کی ثقافت کے زیراثر دریابادی نے انگریزی میں بھی ڈائے آف اللہ ترجمہ کیا ہے، اور جب وہ کہتے ہیں ہو از بیٹر ایٹ ڈائنگ دین اللہ تو صورت حال بالکل خراب ہو جاتی ہے۔ البتہ انگریزی تراجم میں ڈاکٹر ہلالی، محسن خان، اور صحیح انٹرنیشنل نے بالکل درست ترجمہ کیا ہے۔ اس سے معلوم ہوتا ہے مترجم کو تفسیر بالماثور کا علم ہونا کتنا ضروری ہے۔

 

جی، مجھے لگتا ہے کہ نصوص میں ترجمہ تفسیریہ ہی کرنا چاہیے۔

 

یہاں میرے خیال میں دو الگ الگ چیزیں ہیں اگر ان میں تفریق رکھی جائے تو بات سمجھنے میں آسانی ہو گی، وہ اس طرح کہ:
ایک ہے کسی لفظ کا معنی
اور دوسرا ہے اس لفظ سے مراد کیا ہے؟
مثلا: سورت یاسین میں ہے کہ "وجاء من أقصى المدينة رجل يسعى" یہاں پر رجل اور مدینہ ان دونوں کا معنی بالترتیب آدمی اور شہر ہے، یہ اس کا معنی ہے، لیکن اس سے مراد کیا ہے؟ یعنی وہ کون آدمی ہے اور وہ کون سا شہر ہے؟ تو مسئلہ واضح ہو جائے گا۔
بالکل یہی صورت حال "صبغۃ اللہ" کے متعلق ہے، اس کا معنی اللہ کا رنگ ہے، لیکن اللہ کے رنگ سے مراد کیا ہے؟ وہ اللہ کا دین ہے۔
یہاں پھر مسئلہ کھڑا ہو گا کہ اس تعبیر کی خاص وجہ؟ تو اس کا حل اس آیت کا شان نزول واضح کر دے گا۔

یہ ایک ادنی سے طالب علم کی جانب سے وضاحت ہے، کامل علم تو اللہ کے پاس ہے، دعا ہے کہ اللہ تعالی ہمیں اُس میں سے مزید عطا فرمائے۔

 

جیسے کہ میں نے عرض کیا تھا کہ ترجمہ بھی ایک حد تک تفسیر ہی ہوتا ہے، تو "ایک حد" کی قید لازمی ہے؛ کیونکہ متعدد صحیح مفاہیم رکھنے والے جملے کا ایک ہی پیرائے میں ترجمہ یا تفسیر بیان کرنا ممکن نہیں ہوتا، اگر آپ ہمیشہ تفسیری ترجمہ کریں گے یا مرادی معنی بیان کر دیں گے تو ممکن ہے کہ کہیں نہ کہیں جا کر کوئی سقم پیدا ہو جائے؛ اس کی وجہ یہی ہے کہ ہر لفظ کی کامل دلالت بیان کرنا ممکن نہیں ہوتا۔
واللہ اعلم