ہم آزاد ہیں

آج کل کے حالات دیکھ کر ضمیر جعفری کی یہ نظم بار بار یاد آرہی تھی ۔ ضمیریات سے ملی تو اردو مجلس کے لیے لکھ ڈالی ۔ آخری شعر کیا صادق آتا ہے ہمارے تصور آزادی پر ۔ عجیب بات ہے کہ "ضمیریات" کے مطابق یہ ۱۹۵۸ن میں لکھی گئی ۔ کیا یہی ہے وہ ترقی جو ہم نے کی ہے ؟

فرد ہو یا ملک تنہائی کا یارا بھی نہیں
بھائی چارے کے بہ جز کچھ اور چارہ بھی نہیں

ہم نے یہ مانا اکیلے میں گزارا بھی نہیں
بات ہو جائے کسی سے یہ گوارا بھی نہیں

ہم عجب آزاد ہیں ہم کس قدر آزاد ہیں
ہم زمانے سے بہ انداز دگر آزاد ہیں

آج کل دنیا سمٹ کر ایک کاخ و کو میں ہے
ایک قدم لاہور میں ایک ٹمبکٹو میں ہے

بم شکاگو میں دھمک سارے ہنو لولو میں ہے
لالہ مصری خان لیکن اپنی ہاو ہو میں ہے

وہ یہ کہتا ہے کہ ہم مردان نر آزاد ہیں
ہم زمانے سے بہ انداز دگر آزاد ہیں

آئیے اب گھر میں آزادی کا منظر دیکھیے
جز بہ جز بکھرا ہوا دفتر کا دفتر دیکھیے

اپنی صورت اپنے آئینے کے اندر دیکھیے
شرم آئے گی مگر جانِ برادر دیکھیے

ہم تو آزادی سے بھی کچھ بیش تر آزاد ہیں
ہم زمانے سے بہ انداز دگر آزاد ہیں

خواب آزادی کی یہ تعبیر سمجھے ہیں ضمیر
یار ماری چور بازی سمگلنگ، دار و گیر

گھات میں بیٹھا ہوا ہے کیا پیادہ کیا وزیر
اپنا اپنا کوہکن ہے اپنی اپنی جوئے شیر

بے نیاز امتیاز خیرو شر آزاد ہیں
ہم زمانے سے بہ انداز دگر آزاد ہیں

شاعر : ضمیر جعفری
از ضمیریات
​

 

ہم تو آزادی سے بھی کچھ بیش تر آزاد ہیں
ہم زمانے سے بہ انداز دگر آزاد ہیں


بالکل صحیح

 

آج انور شعور صاحب نے اپنے قطعے میں کچھ ایسی ہی بات کہی۔

ہم۔۔۔
ہم نہیں خوگر کسی دستور کے
ہم کسی اخلاق کے عادی نہیں
بھائیو اس خطہء آزاد میں
کون سا دن یوم آزادی نہیں!

شاعر: انور شعور
13 اگست 2017
https://jang.com.pk/print/360460-hum​