یہ عرض پھر کروں گا

یہ عرض پھر کروں گا



گھر میں ہوا تھا کیا کیا، یہ عرض پھر کروں گا
پھر عرض کیا کروں گا، یہ عرض پھر کروں گا

دو لخت گر نہ ہوتے، پھر کیسے حصہ ملتا
کس کو ملا تھا حصہ، یہ عرض پھر کروں گا

جب تک رہے گا رسہ، رسہ کشی رہے گی
کب تک رہے گا رسہ، یہ عرض پھر کروں گا

ملا نے کیا کِیا تھا، ملا نے کیا کِیا ہے
ملا کرے گا کیا کیا، یہ عرض پھر کروں گا

حجرا پڑا ہے سونا اور پیر جی ہیں غائب
حجرے میں کیا ہوا تھا، یہ عرض پھر کروں گا

جتنا نما نما تھا، اتنا وہ خوش نما تھا
کتنا وہ خوش نما تھا، یہ عرض پھر کروں گا

شانے پہ جو پڑا تھا، کہنے کو تھا دوپٹہ
کتنا سا تھا دوپٹہ، یہ عرض پھر کروں گا

دونوں تھے روٹھے روٹھے، بیوی میاں ہوں جیسے
دونوں میں کیا تھا رشتہ، یہ عرض پھر کروں گا

لڑکی کلاسیکل تھی، لڑکا کلاس کا تھا
اب کس کلاس کا تھا، یہ عرض پھر کروں گا

لڑکی نے بھی قبولا، لڑکے نے بھی قبولا
دونوں نے کیا قبولا، یہ عرض پھر کروں گا

دولہا دلہن تھے راضی، آیا تھا پھر بھی قاضی
قاضی نے کیا کِیا تھا، یہ عرض پھر کروں گا

عِرق النساء کا نسخہ، مہر النساء نے لکھا
نسخے میں کیا لکھا تھا، یہ عرض پھر کروں گا

جس میں تھے شعر میرے، غائب ہے وہ لفافہ
وہ ہے کہاں لفافہ، یہ عرض پھر کروں گا

غالب کو کیسے کیسے، مغلوب کر رہے ہیں
نکلے گا کیا نتیجہ، یہ عرض پھر کروں گا

بے وزن سب تھے مصرعے، شاعر مگر تھا وزنی
شاعر کا وزن کیا تھا، یہ عرض پھر کروں گا

رشوت میں جو ملا تھا، یوں ہی سا کچھ ملا تھا
یونہی سا کیا ملا تھا، یہ عرض پھر کروں گا

کچھ دے کے کچھ لیا تھا، کچھ لے کے کچھ دیا تھا
کیا کچھ لیا دیا تھا، یہ عرض پھر کروں گا

تشویش تو یہی ہے، تشخیص کیسے کی تھی نوری
لڑکی ہے یا وہ لڑکا، یہ عرض پھر کروں گا،


کچھ عرض کر دیا ہے، کچھ عرض پھر کروں گا
پھر عرض کیا کروں گا، یہ عرض پھر کروں گا
​

 

شریک مجلس کرنے کا شکریہ۔ امیرالاسلام ہاشمی کی یہ غزل کہیں کہیں درست ٹائپ نہیں کی گئی۔

 

جی ہاں میں نے کچھ اضافہ کیا تھا اسی وجہ سے

 

اچھا ،یوں کسی کی تخلیق میں اضافہ کیا نہیں جا سکتا۔ ہاں الگ سے اپنے اشعار کسی کی زمین میں کہے جاسکتے ہیں۔ یا پیروڈی کی جا سکتی ہے۔

اس میں کئی اشعار کم بھی ہیں

رشوت جو روکنا ہے جائز اسے کرا لو
یہ جائزہ ہے کس کا یہ عرض پھر کروں گا
​

اور سب سے مقبول جس میں ہاشمی سرمے پر تبصرہ تھا

اہل نظر کو شک ہے سرمہ نہیں لگاتا
یہ ہاشمی ہے کیسا یہ عرض پھر کروں گا ​

 

جزاک اللہ

 

ہاشم صاحب کے لیے پیروڈی
آپ عرض جب کریں گے ہم یاں نہیں رہیں گے
تو کیا خاک عرض کریں گے کہ عرض پھر کروں گا

 

جو عرض کر رہے ہیں کہ عرض پھر کریں گے
وہ عرض کیا کریں گے یہ عرض پھر کروں گا

 

یہ تمام اشعار کچھ سمجھ میں نہیں آۓ
اور اگر آگۓ تو پھر کچھ عرض کروں گا