رونا رلانا

"رونا رلانا"​

ایک امریکن ادبی نقاد ایک مقام پر لکھتا ہے کہ مرد ایک ہنسوڑا جانور ہے اور عورت ایک ایسا حیوان ہے جو اکثر رونی شکل بنائے رہتا ہے۔

مصنف کی خوش طبعی نے اس فقرے میں مبالغے اور تلخی کی آمیزش کر دی ہے اور چونکہ وہ خود مرد ہے اس لئے شاید عورتوں کو اس سے کلی اتفاق بھی نہ ہو لیکن بہرحال موضوع ایسا ہے جس پر بہت کچھ کہا جا سکتا ہے۔

میرے ایک دوست کا مشاہدہ ہے کہ عورتوں کی باہمی گفتگو یا خط وکتابت میں موت یا بیماری کی خبروں کا عنصر زیادہ ہوتا ہے۔ نہ صرف یہ بلکہ ایسے واقعات کے بیان کرنے میں عورتیں غیرمعمولی تفصیل اور رقت انگیزی سے کام لیتی ہیں۔ گویا ناگوار باتوں کو ناگوار ترین پیرائے میں بیان کرنا ان کا نہایت پسندیدہ شغل ہے۔ ان سے وہ کبھی سیر نہیں ہوتیں۔ ایک ہی موت کی خبر کے لئے اپنی شناساؤں میں سے زیادہ سے زیادہ سامعین کی تعداد ڈھونڈ ڈھونڈ کر نکالتی ہیں ایسی خبر جب بھی نئے سرے سے سنانا شروع کرتی ہیں ایک نہ ایک تفصیل کا اضافہ کر دیتی ہیں اور ہر بار نئے سرے سے آنسو بہاتی ہیں اور پھر یہ بھی ضروری نہیں کہ موت یا بیماری کسی قریبی عزیز کی ہو۔ کوئی پڑوسی ہو، ملازم ہو، ملازم کے ننھیال یا سہیلی کے سسرال کا واقعہ ہو، گلی میں روزمرہ آنے والے کسی خوانچہ والے کا بچہ بیمار ہو، کوئی اُڑتی اُڑتی خبر ہو ، کوئی افواہ ہو۔ غرض یہ کہ اس ہمدردی کا حلقہ بہت وسیع ہے:
"سارے جہاں کا درد ہمارے جگر میں ہے"

نہ صرف یہ بلکہ رقت انگیر کہانیوں کے پڑھنے کا شوق عورتوں ہی کو بہت زیادہ ہوتا ہے اور اس بارے میں سب ہی اقوام کا ایک ہی سا حال ہے۔ غیرممالک میں بھی رلانے والی کہانیاں ہمیشہ نچلے طبقہ کی عورتوں میں بہت مقبول ہوتی ہیں۔ گھٹیا درجے کے غم نگار مصنفین کو اپنی کتابوں کی قیمت اکثر عورتوں کی جیب سے وصول ہوتی ہے۔ وہ بھی عورتوں کی فطرت کو سمجھتے ہیں۔ کہانی کیسی ہی ہو اگر اس کا ہر صفحہ غم والم کی ایک تصویر ہے تو اس کی اشاعت یقینی ہے اور عورتوں کی آنکھوں سے آنسو نکلوانے کے لئے ایسے مصنفین طرح طرح کی ترکیبیں کرتے ہیں۔ کبھی ایک پھول سے بچے کو سات آٹھ سال کی عمر میں ہی مار دیتے ہیں اور بستر مرگ پر توتلی باتیں کرواتے ہیں۔ کبھی کسی یتیم کو رات کے بارہ بجے سردی کے موسم میں کسی چوک پر بھوکا اور ننگا کھڑا کر دیتے ہیں۔ اور بھی رقت دلانی ہو تو اسے سید بنا دیتے ہیں۔ یہ کافی نہ ہو تو اسے بھیک مانگتا ہوا دکھا دیتے ہیں کہ ”میری بوڑھی ماں مر رہی ہے۔ دوا کے لئے پیسے نہیں۔ خدا کے نام کا کچھ دیتے جاؤ۔ کبھی کسی سگھڑ خوب صورت نیک طینت لڑکی کو چڑیل سی ساس کے حوالے کرا دیا۔ یا کسی بدقماش خاوند کے سپرد کر دیا۔ اور کچھ بس نہ چلا تو سوتیلی ماں کی گود میں ڈال دیا اور وہاں دل کی بھڑاس نکال لی۔ پڑھنے والی ہیں کہ زاروقطار رو رہی ہیں اور بار بار پڑھتی ہیں اور بار بار روتی ہیں۔

خود عورت کی تصنیفات اکثر ہچکیوں میں لپٹی ہوئی اور آنسوؤں میں لتھڑی ہوئی ہوتی ہیں۔ پاکستان میں جو کتابیں عورتوں نے لکھی ہیں۔ اکثر میں نزع، بیماری، دق، سل، خودکشی، زہر، ظلم وتشدد، ایک نہ ایک چیز کا سماں باندھ دینا گویا فرض جانا۔ ہاں کوئی کروشیا یا کھانا پکانے کی کتاب ہو تو اور بات ہے۔

آخر یہ مصیبت کیا ہے۔ یہ بات بات پر صفِ ماتم بچھ جانا کیا معنی؟ بار بار سوچتا ہوں کہ آخر اس امریکن نقاد نے کیا غلط کہا؟ جل کے کہا سہی۔ لیکن بڑی بات کیا کہی!

کسی گھر میں موت واقع ہوجائے تو زنانے اور مردانے کا مقابلہ کیجئے۔ مردوں کا ماتم تو صاف دکھائی دیتا ہے۔ بیچارے گھر کے باہر بیٹھے ہیں۔ سر نیچا کئے چپ چاپ۔ آنکھیں سرخ ہیں۔ کبھی کبھی آنسو بھی ٹپک پڑتے ہیں یا کسی نہ کسی انتظام میں مصروف ہیں۔ چہرے پر تھکن اور اداسی بنی ہے اور قدم ذرا آہستہ آہستہ اٹھتے ہیں۔ اور زنانے کا ماتم تو دور دور سے موت کے گھر کا پتہ دیتا ہے۔ اور جب کوئی نئی فلاں بی بی ڈولی سے اتر کر اندر جاتی ہے تو ماتم کی بھنبھناہٹ میں ازسرنو ایک لہر اٹھتی ہے۔ جیسے یک لخت کوئی ہوائی جہاز سے گرپڑے۔ مرد تو دوسرے تیسرے دن کام میں مشغول ہوجاتے ہیں لیکن عورتوں کے ہاں مہینہ بھر کو ایک کلب قائم ہوجاتی ہے۔ گلوریوں پر گلوریاں کھائی جاتی ہیں اور چیخوں پر چیخیں ماری جاتی ہیں۔

کہیں بیمار پرسی کو جاتی ہیں تو بیمار میں وہ وہ بیماریاں نکال کر آتی ہیں جو ڈاکٹر کے وہم وگمان میں نہ تھیں۔ جتنی دیر سرہانے بیٹھی رہیں، بیمار کی ہر کروٹ پر ہاتھ ملتی ہیں۔ بے چارہ کہیں گلا صاف کرنے کو بھی کھانسے تو یہ سورة یٰسین تک پڑھ جاتی ہیں۔ رنگت کی زردی ، بدن کی کمزوری، سانس کی بےقاعدگی، ہونٹوں کی خشکی، ہر بات کی طرف توجہ دلاتی ہیں۔ حتیٰ کہ بیمار کو بھی اپنی یہ خطرناک حالت دیکھ کر چاروناچار مخنی آواز میں بولنا پڑتا ہے۔ جوں جوں بیمار پرس عورتوں کی تعداد بڑھتی جاتی ہے موت قریب آتی جاتی ہے۔ اور مجھے یقین ہے کہ بعض عورتوں کو مریض کے بچ جانے پر صدمہ ہوتا ہوگا کہ اتنی تو بیمار پرسی کی اور نتیجہ کچھ بھی نہ نکلا۔

عورتیں نہ صرف دوسروں کے غم میں مزے لے لے کر روتی ہیں۔ بلکہ دوسروں کی اشک باری کے لئے خود بھی سامان مہیا کرنے میں کوتاہی نہیں کرتیں۔ ایک پرانے زمانے کے بزرگ اپنی اہلیہ کے متعلق فرمایا کرتے ہیں کہ ہماری گھر والی بھی اپنا جواب نہیں رکھتیں کہ کوئی پڑوسن آکے کہہ دے! کہ اے بوا ماشا الله آج تو تمہارے چہرے پر رونق برس رہی ہے تو جھنجھلا کر بول اٹھتی ہیں کہ تیرے دیدوں میں خاک۔ میں تو مری جاتی ہوں اور میرا برا چاہنے والوں کو ابھی میں ہٹی کٹی نظر آتی ہوں۔ اور کوئی آکے کہہ دے کہ اے ہے بیٹی تجھے کیا ہو گیا۔ تُو تو دن بدن گھلتی جاتی ہے۔ نہ جانے تجھے کیا غم کھا گیا؟ تو ایسی پڑوسن کو فوراً خالہ کا لقب مل جاتا تھا۔ بڑی خاطر تواضع ہوتی تھی۔ گھر کا کام کاج چھوڑ کر شام تک ان کو اپنے دکھڑے سنائے جاتے تھے اور چلتے وقت وہ پانچ روپے قرض بھی لے جایا کرتی تھیں جن کی ادائیگی کے لئے کبھی تقاضا نہ کیا جاتا تھا۔

اپنے اوپر رحم دلانے کا مرض جس کسی میں بھی پایا جائے۔ بہت ذلیل مرض ہے لیکن عورتوں میں یہ اس قدر عام ہے کہ خوش حال گھرانے کی بہو بیٹیاں بھی گفتگو میں چاشنی پیدا کرنے کے لئے کوئی نہ کوئی دکھ وضع کرلیتی ہیں۔ اور موقع موقع پر سنا کر داد لیتی ہیں۔

اس تحریر سے میرا مطلب ان بہنوں کا مذاق اڑانا ہرگز نہیں جو فی الواقع غمگین یا مصیبت زدہ ہیں۔ ان کی ہنسی اڑانا پرلے درجے کی شقاوت ہے۔ جو خدا مجھے نصیب نہ کرے۔ کسی کا غم ایسی بات نہیں جو دوسرے کی خوش طبعی کا موضوع بنے۔ صرف یہ بتانا مقصود ہے کہ زندگی کا بہت سا دکھ، ضبط، تحمل، اور خندہ پیشانی سے دور ہوسکتا ہے۔ [GLOW]کسی مصیبت زدہ شخص کے ساتھ سب سے بڑی ہمدردی یہ ہے کہ اس کا غم غلط کرایا جائے۔ کسی بیمار کی سب سے بڑی تیمارداری یہ ہے کہ اس کی طبیعت کو شگفتہ کرنے کا سامان پیدا کیا جائے۔ غم کو برداشت کرنے کا بہترین طریقہ یہ ہے کہ اس کو ضبط کرنے کی کوشش کی جائے۔ مہذب شص کی یہی پہچان ہے۔ اپنے دکھ کے قصے کو بار بار دہرا کر کسی دوسرے شخص کو متاثر کرنے کی کوشش کرنا گویا اپنے آپ کو ذلیل کرنا ہے۔ خود بھی ہنسو اور دوسروں کو بھی ہنساؤ۔ دنیا میں غم کافی سے زیادہ ہے اس کو کم کرنے کی کوشش کرو، ہنسنا اور خوش رہنا دماغ اور جسم کی صحت کی نشانی ہے۔ غم نگار مصنفین کو میں صرف اتنا کہنا چاہتا ہوں کہ وہ شخص انمول ہے جو اپنی تحریر سے ہزارہا لوگوں کو خوش کردیتا ہے اور وہ شخص خدا کے سامنے جواب دہ ہوگا جو اپنے زور قلم سے ہزارہا جوان، معصوم، خوش مزاج عورتوں اور مردوں کو رُلاتا ہے۔ اور رُلاتا بھی اس طرح ہے کہ نہ اس سے تزکیہ نفس ہوتا ہے نہ کوئی دل میں امنگ پیدا ہوتی ہے۔ اور ہزار قابل افسوس ہے وہ شخص جو یہ سب کچھ کرکے بھی اپنی انشا پردازی پر ناز کرتا ہے۔[/GLOW]

تخلیقات پطرس بخاری (تہذیب نسواں)​

 

بہت خوب!

 

جزاک اللہ خیرا
بہت خوب
اچها سبق دکه کو نہیں سکه کو پهیلاؤ.اپنے دکهوں اور رونے کو شیئر کرنے سے ایک نقصان یہ بهی اللہ تعالی کی بہت سی نعمتوں کی نا شکری بهی ہو جاتی ہے.
اللہ ہمیں صبر جمیل دے .
میں مزید کہوں گی کہ عورت اگر ضبط کرنا چاہے تو اللہ نے اس کو پہاڑوں جیسی مضبوطی بهی دی ہے.

 

بہت زبردست ! بہت اچھی نصیحتیں ہیں ۔ آج کے زمانے کو دیکھا جائے تو لوگ دکھ بانٹنا تو دور کی بات ، آپ کی تکلیف پر باتیں بنانے کا کوئی موقع ہاتھ سے جانے نھیں دیتے۔ اور یہ چیز پھر مزید مایوسی اور ناشکری کا باعث بنتی ہے۔اس لیے ہمیشہ صبر اور حوصلہ کے ساتھ صرف اللہ کی ذات پر بھروسہ کرنا چاہیے۔

 

بہت ہی شگفتہ تحریر ہے! دل خوش ہوگیا۔
واقعی یہ بات درست ہے کہ خوش مزاج لوگوں کی صحبت انسان کو سکون دیتی ہے۔ ہر چیز کا تناسب صحیح ہونا چاہیے بس۔

 

ویسے مریم ! میں سوچ رہی ہوں کہ ان اقتباس پر خود کمنٹ کرنے کے بجائے آپ ہی کے کمنٹ سکین کر کے یہاں چسپاں کر دوں

 

جی آپ کو بالکل اجازت ہے۔ مگر اس کا فائدہ نہیں

 

بالکل درست۔ مجھے اکثر خیال آتا ہے کہ ہم سب میں صبر کی زبردست قوت چھپی ہوئی ہے، بس کو استعمال کرنے کے لیے آمادگی کی ضرورت ہے۔

 

کسی کے غم کو محسوس کرنا اچھی بات ہے،لیکن جب خواتین ڈرامے یا ناول کے غیر حقیقی کرداروں کے غم پر روتی ہیں تو ہنسی آ جاتی ہے۔

 

اجازت مل گئی ہے ، چسپاں کر دیں اب : )

 

ایویں مریم کو تنگ کررہی تھی! اصل میں محترمہ نے میگزین میں اس مضمون پر جا بجا اقتباسات کو خط کشیدہ کر کے کہیں کمنٹس کیے ہوئے تھے تو کہیں سمائیلیز بنائی ہوئی تھیں گویا میگزین نہ ہوا فیس بک یا مجلس ہوگئی! : )

 

میرے لیے ایک تصویر لے لیں : )
ویسے مجھے ونکی ہاؤس ایلف یاد آ رہی تھی، خاص طور پر اس کا پروپرلی اشیمڈ فور بینگ فری۔

 

اس کا رونا رلانا؟ ویسے مجھے ونکی کوئی خاص پسند نہیں ہے۔۔

 

آپ تشریف لے آئیں کبھی ہمارے دولت خانے پر تو پھر دیکھ لیجیے گا : )

لگتا ہے مریم کے 'عشق' سے واقفیت ہو گئی ہے آپ کی بھی جو پڑھائی میں کھو گیا۔۔۔!

 

کونسا؟ مطالعہ ؟ فکشن یا بلخصوص ہیری پورٹر سیریز؟

 

بالخصوص ایچ پی سیریز

 

جی اس کا رونا، میرے خیال میں اس کردار میں بعض مظلوم طبقوں کی نمائندگی ہے جو خود بھی ظلم کی چکی سے باہر نہیں آنا چاہتے۔

 

یہ دیکھیے رونا رلانا اور سوچیں کہ اتنا ااا ڈرامہ بھی ہو سکتا ہے؟
http://www.vidrail.com/video/16532/...nce-To-Tell-Stories-Shocking-Video-Reviewitpk

 

السلام علیکم ورحمتہ اللہ وبرکاتہ
عین سسٹر کمال کی چیز دکھا دی ہے آج آپ نے۔اتنی ہنسی آئی اسکے رونے پہ کہ میرے بھی آنسو نکل آئے۔اللہ تعالی ہدایت کی نعمت سے نوازے

 

آمین، ویسے ان کی روزی کا معاملہ ہے، ایک پروگرام میں گلیسرین لگا کے روئے کہ پندرہ سال سے اولاد ہی نہیں، دوسرے میں روئے کہ دو بیٹے خود ہی پال رہی ہوں۔
ایک ادارے میں میں نے ایسی خاتون دیکھی تھیں، ان کے پاس اکثر کوئی تکلیف دہ کہانی ہوتی تھی جس کے بعد ادھار یا قرض مانگتی تھیں۔ ادارے کے نئے نئے ملازم ان کا نشانہ ہوتے تھے کیوں کہ پرانے لوگوں کو معلوم ہوتا تھا ان کا طریقہ واردات کیا ہے۔