خواب غفلت میں سوئے ہوئے مومنو

خواب غفلت میں سوئے ہوئے مومنو
عیش وعشرت بڑھانے سے کیا فائدہ
آنکھ کھولو اٹھو یاد رب کو کرو
عمر یوں ہی گنوانے سے کیا فائدہ

کیوں اپنے رب کو جوانی میں بھولا ہے تو
اور طاقت کے بوتے پہ پھولا ہے تو
جب جوانی ڈھلے گی تو پچھتائے گا
ایسے رونے رلانے سے کیا فائدہ
خواب غفلت میں سوئے ہوئے مومنو

تھا حکومت کا فرعون کو بھی نشہ
ظلم پر ظلم خلقت پہ کرتا رہا
جب سمندر میں ڈوبا تو کہنے لگا
اس حکومت کے پانے سے کیا فائدہ

کتنا معروف قصہ ہے شداد کا
روح جب اس کے تن سے نکالی گئی
مرتا مرتا بھی وہ لوگوں سے کہتا گیا
ایسی جنت بنانے سے کیا فائدہ

قابلِ ذکر قِصہ ہے نمرود کا
وہ بھی انکار کرتا تھا معبود کا
اس کے بھیجے کو مچھر نے کھا کر کہا
یوں بڑائی دکھانے سے کیا فائدہ

اپنی شہرت پہ محسنؔ نہ تو یوں مچل
ایک دن آ دبوچے گی تجھ کو اجل
روح کو صاف کر نیک اعمال کر
نیک اعمال کر روح کو صاف کر
جسمِ ظاہر بنانے سے کیا فائدہ​