علماء کے ذوقِ نحو کی نذر

علماء کے ذوقِ نحو کی نذر

نحوی غزل

سُن میری نَحو میں کچھ
تُجھ سے یہ گُفتگو ہے
ڈُوبا ہُوں بحرِ غم میں
جِس کا کِنارہ تُو ہے

تیرا سِتَم ہے مصدر
ہر زخم تجھ سے مُشتَق
چَھلنی ہُوا ہے سینہ
جامِد مگر لَہُو ہے

ہے زُلف تیری سالِم
یہ دِل مِرا مُکسَّر
کر جمع دونوں کو تُو
مُحتاجیِ رَفُو ہے

تُو معرِفہ سراپا
پہچان میری نکرہ
لُوں نام گَر میں اپنا
کہتا کہ کون تُو ہے

ہر دن نیا تعلّق
مُعرَب ہو جیسے کوئی
رنجِش ہے مجھ سے مَبنی
ایسا تُو تُند خُو ہے

رکھتا ہوں میں ہمیشہ
سر زیر تیرے آگے
تیرا مُضاف اِلَیہ میں
میرا مُضاف تُو ہے

ہوں کیوں نہ پھر برابر
اعراب دونوں ہی کے
موصُوف تیرا پیکر
اور صِفت تیری خُو ہے

تُو جُملہ اِسمِیہ ہے
تیری خبر مُقدَّم
تُو مُبتدا خبر کا
آغازِ گفتگُو ہے

میں ظرفِ مُستَقَر ہوں
تُو فِعلِ حَذف میرا
تیرے بَجُز نہیں کچھ
تیری ہی جُستجُو ہے

کیا غیرِ مُنصرف ہوں
جو یوں تُو مِثلِ تنوین
رہتا ہے دُور مجھ سے
جیسے مِرا عَدُو ہے

ہر ہر خبر تِری میں
اِنشائیہ سمجھ کر
یوں پی گیا ہوں جیسے
چَھکتا ہُوا سَبُو ہے

بدلے سُوال لاکھوں
پر ہر جواب اُلٹا
لائے نفی کے جیسے
ہر وقت دُو بَدُو ہے

دیوانہ ہوں اگرچہ
پر تیرے حُسن ہی کے باعِث
مذکور فعل میں ہوں
مفعول تُو لَہُ ہے

معطوف میری گردن
متبوع تیرا خنجر
یُوں خُود بَخُود پلٹتا
تلوار پر گُلُو ہے

اِسمِ مُبالَغہ ہے
یا اِسم تیرا تفضیل
ہاں دونوں ہی بجا ہیں
اس میں کہاں غُلُو ہے

حُسن و جمال تیرا
صفتِ مُشبّہ ٹھہرا
سب دائمی غضب کا
انداز رنگ و بُو ہے

سُنتا نہیں مِری اِک
کرتا ہوں سو نِدائیں
کیسا ہے تُو مُنادٰی
کیسا تُو چارہ جُو ہے

کہنے کو تُو ہے مَرجع
لیتا نہیں خبر بھی
میرا ضمیر کرتا
کتنی ہی ہاؤ ہُو ہے

سترہ حروفِ جارہ
ستّر ادائیں تیری
کرتی ہیں زیر دونوں
جاتا جو پیش رُو ہے

تیرا وُجود مَصدَر
ہر باب تجھ سے قائِم
تیرے بغیر میرا
ہر فِعل فالتو ہے

حافِظؔ جو ہوتا نحوی
ترکیبِ زِیست کرتا
زیر و زبر بدلتا
بس یہ ہی آرزو ہے

بشکریہ عبدالقہار محسن بھائی

 

شکر ہے ہم بچ گئے، علماء کو ہی مخاطب رکھیے اتنی مشکل غزل میں، ویسے یہ حافظ کون ہیں؟ اور عبدالقہار محسن بھائی تو جانے پہچانے لگتے ہیں انہیں بھی کھینچ لائیے ، ہماری تو یہی درخواست ہے ان سے:


ایجاب گر کرو تم
مجلس پہ آ رہو تم
تیرے حرف انبساط
کی شدت سے آرزو ہے

 

عبدالقہار محسن بھائی یقینا جانے پہچانے بھائی ہیں اردو مجلس کے.
چند دن پہلے ان کی والدہ کا انتقال ہو گیا تھا.
اللہ تعالی ان کی والدہ کی مغفرت کرے آمین

 

آمین!
بھائی جی ان کی والدہ کے مغفرت کے لئے دعائیہ تھریڈ مجلس پر اسی دن لگا دیا گیا تھا۔

ابن حسیم بھائی (عبدالقھار محسن) کی والدہ کا انتقال پر ملال!

 

ماشاء اللہ