علی العوضی سے قبل حضرت عبداللہ بن الزبیر نے تیر کر کعبے کا طواف کیا!

علی العوضی سے قبل حضرت عبداللہ بن الزبیر نے تیر کر کعبے کا طواف کیا!​

العربیہ ڈاٹ نیٹ ـ محمد الحربی
بدھ 13 جون 2018م

Spoiler

آج سے تقریبا 77 برس قبل 1941ء میں مکہ مکرمہ میں طوفانی بارش ہوئی تھی جس کے نتیجے میں مسجد حرام کے مطاف کے صحن میں 1.5 میٹر سے زیادہ پانی کھڑا ہو گیا۔ اس پانی نے حجر اسود کو بھی ڈھانپ دیا تھا۔

Spoiler

اس موقع پر ایک بحرینی لڑکے علی العوضی کی تصویر منظر عام پر آئی تھی جس نے تیر کر نادر انداز سے طواف کی عبادت ادا کی۔ سیرت کی کتابوں میں آتا ہے کہ ایک صحابی رضی اللہ عنہ نے بھی بیت اللہ کا طواف تیر کر کیا تھا۔

علی العوضی 2015ء کے وسط میں فوت ہو چکے ہیں۔ وہ سابقہ اخباری رپورٹوں میں یہ انکشاف کر چکے ہیں کہ طوفانی بارشوں والے سال وہ مکہ مکرمہ میں تعلیم حاصل کر رہے تھے اور ان کی عمر 12 برس سے زیادہ نہیں تھی۔ وہ بارش مسلسل ایک ہفتے تک جاری رہی تھی اور اس دوران دن یا رات میں کسی وقت بھی وقفہ نہیں آیا۔

Spoiler

بارش کے آخری روز العوضی نے اپنے ایک بھائی اور دو دوستوں کے ساتھ حرم مکی جانے کا فیصلہ کیا، اس موقع پر ان کے ہمراہ العوضی کے ایک استاد بھی تھے۔ انہوں نے دیکھا کہ حرم شریف تقریبا پانی میں ڈوبا ہوا ہے۔ اس پر العوضی نے جو تیراکی میں مہارت رکھتے تھے تجویز پیش کی کہ بیت اللہ کا طواف تیر کر کیا جائے۔ بعد ازاں وہ اپنے بھائی اور ایک دوست کے ساتھ اس خیال پر عمل کے لیے آگے بڑھ گئے۔

اس حوالے سے زیر گردش تصویر میں العوضی مقام ابراہیم کے قریب نظر آ رہے ہیں جب کہ ان کا بھائی اور ایک دوست طواف کے بعد بیت اللہ کے دروازے پر بیٹھ کر آرام کر رہے ہیں۔

تیراکی کے ذریعے خانہ کعبہ کا طواف کرنے والی پہلی شخصیت کون؟

سیرت کی کتابوں میں ذکر آیا ہے کہ تیر کر بیت اللہ کا طواف سب سے پہلے معروف صحابی حضرت عبداللہ بن الزبیر بن العوام رضی اللہ عنہ نے کیا۔ ابن ابو الدنیا نے لیث اور مجاہد کے حوالے سے روایت کی تخریج کی ہے کہ "عبادت کا کوئی بات ایسا نہیں جس کو ابن الزبیر نے چھوڑا ہو۔ بیت اللہ میں سیلاب آیا تو دیکھا گیا کہ ابن الزبیر تیر کر طواف کر رہے ہیں"۔
ان کے علاوہ علماء کرام میں البدر بن جماعہ نے بھی تیر کر بیت اللہ کا طواف کیا۔ اس حوالے سے کتاب "کشف الخفاء ومزیل الالباس" میں آیا ہے کہ جب بھی وہ حجر اسود کے متوازی آتے تو اس کا بوسہ لینے کے لیے ڈبکی لگاتے۔

تیر کر طواف کرنا یہ ایک نادر نوعیت کی عبادت ہے۔ مکہ مکرمہ میں متعدد بار بڑے سیلاب آئے تاہم مؤرخین کے مطابق دو مرتبہ کے سوا ایسا موقع نہیں آیا کہ اس میں تیراکی کی جائے۔ ان میں ایک واقعہ اسلام کے آغاز کے زمانے میں اور دوسرا تقریبا 77 برس قبل پیش آیا۔

 

عمدہ معلومات شیئر کرنے کا شکریہ!