حمد پسندیدہ حمدیہ اشعار

بسم اللہ الرحمن الرحیم
السلام علیکم ورحمۃ اللہ وبرکاتہ
یہاں ہم اپنے پسندیدہ حمدیہ اشعار لکھ کر اللہ سبحانہ و تعالی کی حمد و ثنا کریں گے
آمدِ صبح کا جب دیتی ہے پیغام صبا
ذکر ہوتا ہے گلی کوچہ میں گھر گھر تیرا
ثبت ہے جس پہ ابراہیم کی مہرِ تعمیر
ہم نے سجدوں سے بسایا ہے وہ محور تیرا
صحنِ کعبہ میں کہیں نصب مجھے بھی کر دے
سنگِ اسود بھی تِرا میں بھی ہوں پتھر تیرا​

شاعر: راسخ عرفانی​

 

میں تری نوازشوں پر حیران ہو رہا ہوں
قاری نے مجھ کو سورۃ رحمان ہے سنائی

مری زندگی کا حاصل تری یاد بن گئی ہے
ترے فضل کی تمنا مرے دل میں ہے سمائی​

 

میرے سانسوں سے تیرے نام کی خوش بو آئے
حمد و مدحت میں کٹے وقت زیادہ میرا​

 

اللہ ترے سوا کوئی قابل بندگی نہیں
اللہ ترے گدا ہیں سب تخت نشین و تاجدار

اللہ ترے غلام کو کوئی بھی خوف و غم نہیں
اللہ ترے غلام پر شاہوں کے تاج ہیں نثار ​

 

خطائیں دیکھ کر بھی عطائیں کم نہیں کرتا
میں اکثر سوچتا ہوں میرا رب مہربان کتنا ہے

 

ہے یہ کرم ترا کافی مجھے ہے ناز اس پر
کہ تیرے دَر کے سِوا میں کہیں گیا ہی نہیں

ترے سِوا کوئی دعوی کرے خُدائی کا
میں ماننا تو کجا اس کو جانتا ہی نہیں ​

 

آسمانوں پہ ستاروں کوسجاتا تو ہے
اور مہتاب کا فانوس جلاتا تو ہے
یہ تری شانِ کریمی ہے کہ ہر بندے پر
عقل و حکمت کے خزینوں کو لٹاتا تو ہے

محسن احسان​

 

صبر کی منزلوں میں ہوں نالۂ نارسا نہیں
اُس کی دعا ہو مسترد جس کا کوئی خدا نہیں​

 

جینا وہ کیا کہ دِل میں نہ ہو تیری آرزو
باقی ہے موت ہی دلِ بے مدعاّ کے بعد
​

 

گرم رت میں سحاب کی صورت
سایہ گستر رہا خیال ترا

زخم بڑھنے لگے جونہی حد سے
برسا مینہ بن کے اندمال ترا

ماہ و انجم سے ایک جگنو تک
رونق افروزہے جمال ترا

ہر مرض کا علاج تیرا غم
اچھا خوشیوں سے ہے ملال ترا

شاعر: راسخ عرفانی​

 

ہر ایک شۓ میں جھلک وہ اپنی
ربوبیت کی دکھا رہا ہے
نظام اس کائنات کا جو
بحسن و خوبی چلا رہا ہے
وہ مالک رزق ہر نفس ہے
کسی کو رکھتا نہیں ہے بھوکا
امیر ہو یا غریب بندہ
وہ ہر کسی کو کھلا رہا ہے

 

سو تخیل کے آئینے بدلے
عکس اسکا ہی جابجا نکلا

 

جزاک اللہ خیرا عائشہ بہت خوب!

 

وہ میرے عیب چھپا لیتا ہے
ورنہ کیا کیا نہیں ہوتا مجھ سے
سلمان باسط

 

تُو تو شَہ رگ کے پاس تھا، لیکن
طے ہمیں سے یہ فاصلہ نہ ہوا

 

کسی کی مشکلوں میں تو، کسی کے کام جانا
تیری ناممکنوں کو وہ کبھی ممکن بنا دے گا
اتباف ابرک