گاتا رہے میرا دل ۔۔۔

گاتا رہے میرا دل ۔۔۔​

ہمارے ایک دوست نے ایک دفعہ ہم سے فرمایا کہ اُن کے ایک برادرِ نسبتی ایک اسکول میں ملازم ہوئے تو ایک دن وہ اپنے اُسی سالے سے ملنے اس کے اسکول گئے۔ وہ اپنے تقرر پر کچھ خوش تھے اور کچھ اداس۔ اداسی کی وجہ پوچھی گئی تو ایک ناکام سی مسکراہٹ کے ساتھ جھینپ کر خاموش ہی رہے۔ ہمارے دوست نے بھی اسکول کی پرانی عمارت کا اندازہ لگاتے ہوئے زیادہ نہیں کریدا۔
اتفاق سے اُسی وقت ہمارے دوست کو '' فطری ضرورت '' محسوس ہوئی۔ انہوں نے اپنے سالے سے اسکول کے بیت الخلاء کا راستہ دریافت کیا۔
جواب ملا : '' بھائی جان، آپ کو گانا تو آتا ہے ناں ؟ ''
ہمارے دوست نے جھلا کر ایک برہم نظر اُن پر ڈالی تو انہوں نے بوکھلا کر راستہ بتا دیا۔
پھر ہمارے دوست نے مسکراتے ہوئے فرمایا :
'' یار ، جیسے ہی میں بیت الخلاء کے اندر داخل ہوا ، خودکار طور پر میرے منہ سے نغمے جاری ہو گئے ... اور فارغ ہو کر باہر نکلنے تک ... '' گاتا رہے میرا دل ...'' کی صورت ہو گئی تھی ... ''
بات کچھ ہماری سمجھ میں نہیں آئی لہذا ہم ہونقوں کی طرح ان کے چہرے کو تکتے رہے۔ ہمارے دوست نے ہنستے ہوئے یوں راز آشکار کیا کہ :
'' یار ... بات دراصل یہ تھی کہ بیت الخلاء کے دروازے کو چٹخنی ہی نہیں تھی ۔ ''
حقیقت جان کر ہمارے حلق سے بھی قہقہے پھوٹ نکلے۔

چند دن قبل ہمارے یہی دوست ایک خوش خبری کے ساتھ ملے کہ اُن کا بھی تقرر ایک سرکاری اسکول میں ہو گیا ہے۔ ہمارے ذہن میں ان کے سالے کے اسکول کا '' سانحہ '' تازہ تھا ، لہذا ہم نے چھوٹتے ہی معنی خیز الفاظ میں دریافت کیا کہ بھائی، اسکول میں سب کچھ ٹھیک ٹھاک تو ہے ناں ؟
وہ کچھ سمجھے کچھ نہ سمجھے۔ سر ہلاتے ہوئے بولے :
'' ہر سرکاری اسکول میں ٹوائلٹ کا مسئلہ ہوتا ہی ہے یار ... اب یہ اتنا بڑا مسئلہ سمجھا نہیں جانا چاہئے ... ''
ہاں ، ہاں ... اور ویسے بھی آپ کو گانوں کی خوب مشق ہے ... '' ہم نے اپنی بے ساختہ ہنسی کا گلا گھونٹتے ہوئے طعنہ دیا۔ وہ مسکینی سے سر ہلاتے ہوئے بولے :
'' نہیں یار ۔ مشق کی بات نہیں ۔ مجھے ایک نہ ایک طالب علم کو بہر صورت ٹوائلٹ کے باہر کھڑا رکھنا ہی پڑتا ہے احتیاطاً ۔ ''
بات ہماری سمجھ میں نہیں آئی اور ہمارے اصرار پر بھی انہوں نے وضاحت نہیں کی۔
یہ حقیقت تو ہم پر بہت بعد میں روشن ہوئی کہ اُن کا تقرر دراصل '' سماعت سے محروم '' افراد کے اسکول میں ہوا تھا!!

 

بہت خوب باذوق بھائی ۔۔۔۔

 

کیا بات ہے

 

بہت خوب

 

:em: بہت خوب باذوق بھائی ، مزا آگیا

 

بہت خوب ۔
کیا ذوق ہے ۔۔۔۔۔۔۔۔۔۔۔۔۔ باذوق بھائی۔

 

باذوق کیا کہنے آپ کے۔۔۔
گریٹ