ترجمۃ القرآن میں مترجمین کا سہو : دعوۃ للمشارکۃ

بسم اللہ الرحمن الرحیم
أحمد إلیکم اللہ الذی لا إلہ إلا ہو
أما بعد
اس موضوع میں ان آیات کا صحیح ترجمہ پیش کیا جائے گا جن کا ترجمہ عموما غلط کیا جاتا ہے
اور ساتھ ہی اسکے غلط ہونے پر دلیل دی جائے گی
اور غلط ترجمہ کے غلط نتجائج کی نشاندھی بھی کی جائے گی
إن شاء اللہ تعالى
طلبۃ العلم اور علماء سے گزارش ہے کہ وہ بھی اس میں اپنا حصہ ضرور ڈالیں
جزاکم اللہ خیرا وبارک فیکم ​

 

۱۔وَكَذَلِكَ جَعَلْنَاكُمْ أُمَّةً وَسَطاً [البقرة : 143]
درست ترجمہ
اور اسی طرح ہم نے تمکو بہترین امت یا عدالت والی امت بنایا
غلط ترجمہ
اور اسی طرح ہم نے تمکو درمیانی امت بنایا
وضاحت
یہ لفظ وسَط سین کے فتحہ کے ساتھ ہے اسکا معنى بہتر یا میانہ روی یا عدل وانصاف ہوتا ہے اور جب یہی لفظ سین کے سکون کے ساتھ ہو تو اسکا معنى درمیان ہوتا ہے
غلط ترجمہ کا نتیجہ یہ نکلتا ہے کہ امت محمد صلى اللہ علیہ وسلم کے بعد بھی امت آسکتی ہے یعنی عقیدہ ختم نبوت کو ٹھیس پہنچتی ہے کیونکہ درمیانی امت تبھی ہو سکتی ہے جب اسکے پہلے بھی امت ہو اور بعد میں بھی

 

حَافِظُواْ عَلَى الصَّلَوَاتِ والصَّلاَةِ الْوُسْطَى وَقُومُواْ لِلّهِ قَانِتِينَ [البقرة : 238]
نمازوں کی حفاظت کرو اور بالخصوص افضل نماز کی , اور اللہ کے لیے فرمانبردار بن کر کھڑے ہو جاؤ


غلط ترجمہ
نمازوں کی حفاظت کرو اور درمیانی نماز کی بھی...... الخ

وضاحت

کلمہ وسطى اسم تفضیل ہے اور أوسط کی مؤنث ہے اور اسم تفضیل میں برتری کا معنى پایا جاتا ہے

 

قَالَ أَوْسَطُهُمْ أَلَمْ أَقُل لَّكُمْ لَوْلَا تُسَبِّحُونَ [القلم : 28]
ان میں سے افضل نے کہا ...... الخ


غلط ترجمہ
ان میں سے درمیانے نے کہا

وضاحت
أوسط اسم تفضیل ہے .... الخ

 

إِنَّمَا يَخْشَى اللَّهَ مِنْ عِبَادِهِ الْعُلَمَاء [فاطر : 28]

غلط ترجمہ :
اللہ تعالى کے بندوں میں سے صرف علماء ہی اللہ سے ڈرتے ہیں
(یعنی علماء کے علاوہ اور کوئی اللہ سے نہیں ڈرتا !!! )

درست ترجمہ :

اللہ تعالى کے بندوں میں سے علماء صرف اللہ ہی سے ڈرتے ہیں
(یعنی علماء کرام اللہ کے سواء اور کسی سے نہیں ڈرتے )


یعنی مرکز حصر " اللہ " ہے نہ کہ " علماء "

 

قُلْ هُوَ اللَّهُ أَحَدٌ

غلط ترجمہ :
۱۔کہہ دیں کہ اللہ ایک ہے
۲۔ کہہ دیں کہ وہ اللہ ایک ہے

درست ترجمہ :
کہہ دیں کہ اللہ ایک ہی ہے

پہلے ترجمہ میں حصر نہیں ہے جو کہ حرف زائد کا تقاضہ ہے
دو سرے ترجمہ میں حرف زائد کا لفظی ترجمہ کرکے ترجمہ میں " بوئے شرک" داخل کر دی گئی ہے کیونکہ " وہ اللہ " کا تقاضا یا مفہوم " یہ اللہ " بھی ہے !!!
یہاں لفظ " ہو " بطور حرف زائد بغرض " حصر " آیا ہے
خوب سمجھ لیں ۔

 

فَإِنْ آمَنُواْ بِمِثْلِ مَا آمَنتُم به [البقرة : 137]

غلط ترجمہ :
تو اگر وہ اس چیز کی مثل پر ایمان لائیں جس پر تم ایمان لائے ہو ....

درست ترجمہ :
تو اگر وہ اسی طرح سے ہی ایمان لائیں جس طرح تم اس پر ایمان لائے ہو ....


یہاں بھی لفظ "بــ" بغرض حصر طریقہ ایمان ہے

وگرنہ غلط ترجمہ میں قرآن کی مثل کا موجود ہونا لازم آتا ہے !!

 

وَأَمَّا مَنْ آمَنَ وَعَمِلَ صَالِحاً فَلَهُ جَزَاء الْحُسْنَى وَسَنَقُولُ لَهُ مِنْ أَمْرِنَا يُسْراً [الكهف : 88]

غلط ترجمہ :
اور جو ایمان لایا اور صالح عمل کیے تو اسکے لیے اچھی جزاء ہے ....... الخ

درست ترجمہ :
اور جو ایمان لایا اور صالح عمل کیے تو اسکے لیے بطور جزاء اچھائی ہی ہے .......... الخ

یعنی الحسنى جزاء کی صفت نہیں بلکہ یہ تمیز ہے !
اور عبارت فلہ الحسنى جزاء تھی الحسنى کو مؤخر اور جزاء کو مقدم کر دیا گیا ہے حصر پیدا کرنے کے لیے کیونکہ اصول ہے کہ " تقدیم ما حقہ التأخیر یفید الحصر والتخصیص "
اور دنوں تراجم کے نیتجہ میں فرق صاف ظاہر ہے ۔

 

وَمَا أَرْسَلْنَاكَ إِلَّا رَحْمَةً لِّلْعَالَمِينَ [الأنبياء : 107]

غلط ترجمہ
اور ہم نے آپکو صرف جہان والوں کے لیے رحمت بنا کر بھیجا ہے

اور ہم نے آپکو جہان والوں کے لیے صرف رحمت بنا کر بھیجا ہے

اور ہم نے صرف آپکو جہان والوں کے لیے رحمت بنا کر بھیجا ہے


درست ترجمہ

اور ہم نے آپکو صرف جہان والوں پر رحمت کرنے کے لیے بھیجا ہے

وضاحت

رحمۃ للعالمین یہ مفعول لہ ہے " أرسلناک " میں موجود ضمیر " نا " سے
اور مفعول لہ میں یہ اصول کار فرما ہوتا ہے کہ مفعول لہ کا فاعل اور مفعول لہ کے فعل کا فاعل ایک ہی ہوتا ہے
یعنی بھیجنے والا اور رحمت کرنے والا ایک ہی یعنی اللہ تعالى ہے
گویا آیت کا مفہوم یہ ہے کہ
اے پیارے حبیب صلى اللہ علیہ وسلم ہم نے آپکو صرف اس لیے بھیجا ہے تا کہ ہم جہان والوں پر رحمت کریں



خوب سمجھ لیں