نعت نعت اورعصر حاضر کا چیلنج از خلیل الرحمن چشتی

نعت اورعصر حاضر کا چیلنج


​

محمد خلیل الرحمن چشتی

​

گناہ گار لکھ رہا ہے نعتِ سرور جہاں ﷺ​

یہ خاکسار لکھ رہا ہے نعتِ سرورِ جہاں ﷺ

​

مسافرِقلم بہت ہے شادمان و تازہ دم​

ہے راہوارِ فکر بھی ، غریقِ جوش یم بہ یم

​

مہک رہی ہے روشنائی ، فرحتِ خیال سے ​

ابل رہی ہے روشنی ، قلم کے بال بال سے

​

قطار میں کھڑے ہیں لفظ آبرو کے واسطے​

مچل رہا ہے حرف حرف ، شرف کی آرزو لیے

​

نقاط کا نصیب جزوِ نام تو نے ہو سکے ​

اب ان کے دل کی آرزو کہ قرب میں جگہ ملے

​

زہے نصیب میم کے کہ دو جگہ جگہ ملی ​

ابد تلک زبان اس کی حمد سے جڑی ہوئی

​

درود پڑھنا چاہتےہیں عاجزی سے مدتمام​

زبر سے پہلے پیش کر رہا ہےآپؐ کو سلام

​

خلیل ہے یہ کام سخت احتیاط و احتیاط ​

بھپر نہ جائیں تیرے بخت احتیاط و احتیاط

​

یقین ہی دکھا سکے یہ معجزہ عجیب تر​

وہ مؤمنوں کے واسطے ہو ماں سے بھی حبیب تر

​

محبتوں میں فصل گل کی تازگی شگفتگی ​

فداک اختی و اخی ، فداک امی و ابی

​

نہ شرک کا ہو شائبہ ، غلو کا بھی گزر نہ ہو ​

مبالغے کی وادیوں میں شاعری کا گھر نہ ہو

​

ضرورتِ روایتِ ضعیف کیا جنابﷺ کو ​

چراغ کوئی کیا دکھائے ایسے آفتاب کو

​

خیال و صاحبِ خیال دونوں باوضو رہیں ​

نمازِ نعت ٹھیک ٹھیک قبلہ رخ ادا کریں

​

وفورِ ذوق و شوق ہے ورودِ واقعات ہے ​

کبھی سماجیات ہے کبھی معاشیات ہے

​

وہ فلسفی نہ تھا کوئی ، ہوا میں تیر چھوڑتا​

نہ تھا وہ کوئی سائنسدان تجربے نچوڑتا

​

وہ جوگیوں سے مختلف ، وہ ساحروں سے مختلف​

وہ کاہنوں سے مختلف ، وہ شاعروں سے مختلف

​

دہن کھلا تو وحی سے ، کہ اپنی کچھ کہی نہیں ​

کہ گفتگوئے خواہشاتِ نفس اسﷺ نے کی نہیں

​

کبھی نہ تھی جو وحی خالقِ جہاں تو آپﷺ کے​

مشاورت سے تابناک پیارے سار ے فیصلے

​

وہ بے نیاز تخت و تاج و طغرہ وکلاہ تھا​

عجیب حکمران تھا ، عجیب بادشاہ تھا

​

وہ دھوپ دھوپ کا سفر وہ رات رات جاگنا ​

خدا کی بارگاہ میں وہ گڑگڑا کے مانگنا

​

سکندری بھی ہے مگر سکندری یہ اور ہے ​

قلندری بھی ہے مگر قلندری یہ اور ہے

​

تم اس کی زیست میں کوئی غلو نہ دیکھ پاؤ گے ​

کہ ہر جگہ ہے اعتدال ریجھ ریجھ جاؤ گے

​

سپہ گری ہو دیکھنی تو لے چلوں حنین میں ​

دلیلِ تربیت کو آپ دیکھیے حسینؓ میں

​

وہ حجتِ تمام ہے بشر بشر کے واسطے ​

وہ رحمت دوام ہے شجر حجر کے واسطے

​

وہ اپنے عہدوقول سے کبھی ہوا نہ منحرف ​

صداقتوں کے جس کی خود مخالفین معترف

​

زمین پر تھا اس کا راج پیمبری کا سر پہ تاج​

مگر وہ اپنے ہاتھ سے ، کرے جو گھر کا کام کاج

​

وہ اپنے جوتے ٹانکتا ، وہ برتنوں کو مانجھتا ​

وہ اپنی بکری دوہتا ، وہ جس نے خود رفو کیا

​

نصیبِ مشتِ خاک کو نکھارتا ، سنوارتا​

وہ بندشوں کو کھولتا ہو بوجھ کو اتارتا

​

تکبر اس سے دور دور ، تواضع اس کے پاس تھی​

خدا کی عین بندگی فضلیت و اساس تھی

​

وہ اپنی ذات کے لیے ، کبھی ہوا نہ منتقم ​

وہ ذات جس کو رب نے کی عطا جوامع الکلم

​

کمالِ حسن کیا کہوں کہوں گا بس میں اس قدر ​

وہ ﷺچودھویں کی رات میں تھا بدر سے حسین تر !

​

وہ جس کا ہاتھ نرم مثلِ ریشم و حریر تھا ​

جو دوپہر کی دھوپ میں بھی مثلِ زمہریر تھا

​

کبھی جو منہ کو کھولتا تو دوسرا نہ بولتا ​

وہ موتیوں کو رولتا کہ جیسے شہد گھولتا

​

وہ بولتا تو لوگ اس کو منہ تکائے دیکھتے ​

وہ پھول جب بکھیرتا تو پتیاں سمیٹتے

​

کہ اس کی بزمِ ناز میں گپیں نہ کوئی ہانکتا ​

ادب سے اس کو دیکھتا ادھر ادھر نہ جھانکتا

​

وہ طرزِ تربیت تراﷺ کہ آسمان بن گئے ​

وہ بکریاں چرانے والے حکمران بن گئے

​

اصول جس کے ایک جیسے عام و خاص کے لیے ​

وہ جس نے خود کو پیش کر دیا قصاص کے لیے

​

ہزار حاتموں سے بھی بلند جس کی تھی سخا ​

کنواری لڑکیوں سے بھی زیادہ جس میں تھی حیا

​

اتر گئے بوجھ کتنے ناتوان جسم سے ​

مگر دوبارہ ہم نے اپنے آپ پر دھر لیے

​

ستم رسیدگانِ عصر ، فیض سے ہیں بے نیاز ​

کہ ہر ممانعت کا ہم لگے ہیں ڈھونڈنے جواز

​

ہم اسوۂ رسولِ حق ﷺ کے انتفاع سے دور ہیں ​

محبتوں کے دعویدار ، اتباع سے دور ہیں

​

نئے خدا بنا لیے ، نئے صنم تراش کر ​

رواں دواں یہ قافلہ ہے نوکِ اقتصاد پر

​

ہمارے پھول ، علم و فن کی تازگی سے ہیں تہی ​

شجر شجر اداس! ہائے بلبلوں کی بے بسی

​

جہادِ نفس ہے نہ اب ، جہادِ جان و مال ہے ​

کہیں کہیں جو ہے ذرا تو صرف قیل و قال ہے

​

اسیر قطرہ قطرہ ہے لہو لہان ہے ہوا ​

ستم زدہ ہے ذرہ ذرہ سوگوار ہے فضا

​

نئی بساطِ شب بچھی ہے سورجوں کے سامنے ​

سیاہ دھاریاں اٹھیں کرن کرن کے سامنے

​

نئی شکست خوردگی ، بنامِ اعتدال ہے ​

نئے شکاریوں کے ہاں نیا سا ایک جال ہے

​

سیاست و معیشت و علوم ہائے معتبر ​

شکست رفتہ رفتہ ہے ، ہماری ہر محاذ پر

​

مجھے تو رات دن یہی لگا ہوا ہے ایک ڈر​

ہماری نسلِ نو کرے گی شرم اپنے دین پر ؟

​

سوال ہے ! کیا نعت گوئی صرف ایک فن ہے بس؟ ​

رواج اور رسم کی ، حسین انجمن ہے بس!

​

حنین و بدر و احد ؟ جہاد بالکلام ہے ؟​

یا نعت گوئی صرف اک ثواب ہی کا کام ہے ؟

​

عدو کے ساز پر غلام محو رقص ہر طرف ​

منافقت کے سب امام محوِ رقص ہر طرف

​

یہ ابر ہے تو کیوں نہ اس کی چھاؤ ں میں ہوں جمع سب ​

ستم گروں سے بچ کے اسﷺ کے گاؤ ں میں ہوں جمع سب

​

یہ آئنہ ہو سامنے ، تو خود کو ہم سنوار لیں ​

معاشرے کو عدل کی سڑک پہ ہم اتار لیں

​

نہیں نہیں ابھی نہیں ہماری نعت و گفتگو​

مزاج آشنائے سیرتِ رسولﷺ ہو بہو

​

ستم زدہ تمام نعت سن کے باغ باغ ہوں ​

محبتِ رسول ﷺ میں امید کے چراغ ہوں

​

حضور کے غلام سب ، الٹ دیں یہ بساطِ شب​

ہماری نعت کامیاب ہے یہ کہہ سکیں گے تب

​

ہو جس سے دل میں گدگدی ، وہی تو اصل نعت ہے ​

جو دم ہلا دے شیر کی وہی تو اصل نعت ہے

​

فروغِ ذات کا سبب بنے تو نعت نعت ہے ​

ادا ہماری انﷺ کا ڈھب بنے تو نعت نعت ہے ​

​

نعت اور عصر حاضر کا چیلنج مکمل پی ڈی ایف

یونیکوڈائزنگ برائے اردو مجلس : ناچیز

​

 

جزاک اللہ خیرا

 

وایاک

 

جزاک اللہ خیرا

 

جزاک اللہ خیرا

 

جزاک اللہ خیرا

 

جزاک اللہ خیرا